حييت يا شيخ(ن) للأمجاد عشاق=ياطيب السمعه عشير المشاكيل
حييت من غاية ضميري والأعماق=اهديه إلك يا شيخ جمله وتفصيل
احلى من السكر ومن كل الأذواق=وأزكى من العنبر ومن خنة الهيل
ومعها يابن وندان ترحيب مشتاق=ألذ من در البكار المباهيل
اللي رعن وادٍ نبت بعد الإغراق=من مدلهم الغيث سيلٍ بعد سيل
وازهر نباته واخضرت فيه الاوراق=وتذاكروه أهل الولع بالتفاصيل
وانت الذي فيك التماثيل تنساق=مثل السحاب اللي حقوقه هماليل
حيثك يا بو مهدي على الطيب سباق=وهبه من الخلاق ما فيه تمثيل
شيخ عطاك الله مع الطيب الأخلاق=وطوّق ندى طيبك رقاب الرياجيل
ومنجوب من شجرة طويلين الأعناق=اللي علت هاماتهم بالمفاعيل
سبيع راس المجد نزهين الأعراق=أهل النقا وأهل الوفا والمحاصيل
امجادهم تعرف جديدات وعتاق=توارثوا للطيب جيلٍ بعد جيل
وبيتك مقر أهل المكارم وما لاق=سوالفٍ تبري كبود المعاليل
بيت الشرف والجود واخيار الأرزاق=منصى الزحول أهل الوفا والتنافيل
للعز يا بيت الشرف ضاف الأشناق=بجاه الكريم منزل الحق تنزيل
تمت واصلي عدد ما لاح براق=على الرسول مكمل الدين تكميل
والله يوفقك السعادة والأوفاق=وعسى يرافقك السعد والتساهيل