عسى السحاب اللي توايق سبوره=وبرقه يلوح وفالدجاء يشعل اشعال
فيه الرعود امن النصوب امغموره = تسمع لها في بعض الاحيان جلجال
ناشن بعد ماكمل الرب طوره= من مدلهم الغيث ومزونه إثقال
مع مبتدأ الوسمي وبأول أشهوره= بشايرٍ يفرح بها كل وبال
يسوقه الغربي وينشر طهوره= ويجمع شتاته هادي النود بمهال
يهل ودانه وينبت ازهوره = ويروي ثرى قاعن عليها الدهر مال
عسى على نجد العذيه حدوره= وهاك النفود اللي جمع كل الابطال
على الحفر وام الجماجم بكوره= في ماقعٍ لمزاين البوش مدهال
الملتقى اللي كلٍ عام نزوره = وللخليج يالعربي مضرب أمثال
غنت على روس الروابي طيوره= لكل القبايل بين ترحيب واجلال
فيه التلاحم شاد غالي جسوره = من واقع الموقف ومن واقع الحال
أبناء قبايل والفعول امخبوره = على النقاء والطيب ماحوله اجدال
من اقصى الشمال الى جنوبي شروره= ومن الخليج اليا البحر فعل وارجال
وقفاتهم للقلب زادت سروره = وعاداتهم يوفون في كل الافعال
عينٍ على العليا ونفسٍ غيوره= وكفٍ تجود بما ملكته من المال
مدات حاتم في زمانه ودوره= تجددت فالملتقى فال وعقال
كلٍ يدق لطيب الفعل زوره= وتجلت الرفقة على كل الاشكال
مخيماتٍ للجميع امعموره = أبها ينادي للكرم كل هشال
الطيب فيها فايحاتٍ اعطوره= مثل الضباب ليا غشا قور وجبال
وياما سطع نجم تعلا بنوره= كن النجوم الساطعة فوقها أميال
بانت أفعول اهل القلوب الجسوره= واللي سخوا بالمال وافكارٍ إجزال
ولهم حروف الشعر زانت ابحوره = خص الرجال للي تتوج بالافعال
وجاء للثقافه مهرجان ومشوره = ينقل مباشر للملا عبر الارسال
يطري عكاظ وصف حي يزوره = مع فارق التاريخ والوقت والحال
ذكرى عزيزه بالقلوب امحفوره = يبقى توارثها من أجيال لجيال
الجايزه بسم الزعيم امحصوره= عبدالعزيز الفيصلي طيب الفال
أبلٍ تفوز بجايزتها فخوره = من شانها جت حم الاشعاف زرفال
وتجمعت باخر شهر من فطوره= وبأغلى وصايفها تباها وتختال
ياما عرض بوشٍ اوساع انحوره= رثم الخشوم إسناد وارقابها أطوال
ليا شافها الهاوي تغير أشعوره = من زينها يفرح ويعجب ويهتال
وعنها عيون الحاسدين امحجوره= ذكر الولي من دونها حرز واقفال
ماهيب عن هاك الحضور أمعذوره = ولا تستمع في قول ناصح وعذال
الزين ف.. أم ارقيبه أثبت حضوره = لعل يسقيها من الوبل همال
توجهت له بعد ماجاه دوره= الها بهاك الجايزه حظ وامال
والفضل لله ثم للاخوان نوره = اللي لهم في قمة المجد منزال
شجرة وفاء واصل الشجر من جذوره= الاصل ثابت والورق في وظلال
أحيوا تراث فات ماضي عصوره = وردوا مقامه واعتباره بعد زال
يعيش من صار السبب في ظهوره = مشعل صليب الراي لطام من عال
أهتم أبو فيصل بشانه وموره= تشهد عليه ارجال وافعال واطلال
يحسب لبو فيصل مقامه وشوره= وترفع له البيضاء على راس ماطال
ياكاتب التاريخ وضح اسطوره = واكتب وسجل بالذهب مجد وافعال
وسجل ولاءً مابه قصور وفتوره= للعاهل اللي للصعيبات حلال
سجل لبو متعب وفاء من صقوره = من صادق الاحساس في كل الاحوال
وعهدٍ صحيح راسخات اقصوره = يدوم حتى ينفخ الصور ميكال
واثبت نجاح الحفل في كل صوره= ابداع مامثله يورخ وينقال

نواف بن عبدالعزيز بن رازن