دع القلق ماللهواجيس داعي= ولا انت بعلى كثر التفاكير مجبور
سج القدم وافجوج ربي وساعي= ومن الردي واللاش لاتاخذ الشور
الراي يؤخذ من طويل الذراعي= ليا عمست الاريا وجاء للسند دور
والرزق بيدين الكريم المطاعي = رب الملا جالي دجا الليل بالنور
مافي يدين الخلق غير الضياعي=الامر لله وانت منهي ومامور
سبحان منهو للمخاليق راعي= ويعلم خفا الخافي ولا عنه مستور
واليوم أخذ من خبرتي وقتناعي= واسمع ولب وخذ جوابي على الفور
حنا بعصر العولمه والخداعي= والامن وافر واغلب المال ميسور
والناس صارت بين هم وصراعي= وصار التنافس في عمارات وقصور
وكثرالنفاق وكثر سقط المتاعي= وجاء للرياء ميدان واحوال وجسور
وضيع مروات الرجال النزاعي = ومطاوع الشيطان والكبر والزور
وينعى الوفاء مع طول الايام ناعي= ماعاد تسمع له مع الناس منشور
وتلاشت الرفقه وقل الدفاعي= والوصل بين المجتمع صار مقبور
وماعاد للحسنى صدى واجتماعي=حبل الوصل بين العرب صار مبتور
والكذب والتزوير جاله شعاعي= عند الرعاع وكل خايب ومثبور
وللحقد والغيبه مراسل وساعي= ومشجعين وصف عرضه وجمهور
وباق من الاجواد ذخر ومساعي= وتاريخهم بالطيب ثابت ومخبور
أكيد مايضفي عليه القناعي= لا يدخله ريبه وشكات وقصور
مافي الذهب تقليد والاصناعي= يبقى ذهب لو مرت أزمان وعصور
منزالهم دايم بالعال الرفاعي = وتاريخهم في وجه الايام محفور
وخير مال العبد قبل الوداعي= طاعة كريم الوجه بحساس وشعور
صوم وصلاه وحجةٍ باستطاعي= وتقوى بعدها يصبح الذنب مغفور
وخلك معي حاضر وبالفكر واعي= مازال للموضوع زبده وماجور
العز مطلب في جميع البقاعي= مشاع للعالم ولا هوب محصور
ويصعب على اصحاب القلوب الوجاعي= تباعة الممنوع كسارة الكور
يهواه من صيته مع الناس ذاعي= حر تسلسل يجذبه ماكر صقور
عزيز نفس وفيه زين الطباعي= وبينه وبين الكبرياء والرداء سور
والجود يرفع لك عمود الشراعي= كف الندى دايم من الناس مشكور
وادمح خطا الطيب وقدر وراعي= العذر لقلوب المخاليق دكتور
ولاتسمع الواشي خبيث المساعي= خله يعود خاطره منك مكسور
وبالصبر تاطا فوق روس الافاعي = وبالعزم تقدر تعبر أنهار وابحور
ومن طاوع الشيطان والنفس أطاعي= و غره هوى نفسه وحده على الجور
هذاك والله عن هل المجد زاعي= ولابات ليله من عنا الوقت مسرور
ومادامت الدنيا غرور ومتاعي= وفتره زمن وايام وسنين وشهور
ولا من وراها الا النكد والصداعي= وهمومها مع طول الايام طابور
أخير منها سلعة ٍ ماتباعي= البعد كل البعد عن كل محذور

نواف بن رازن